Millatlararo bag‘rikenglik turli xalqlar o‘rtasidagi hurmat, hamjihatlik va o‘zaro tushunish asosida hayot kechirish madaniyatidir.

Bugungi globallashuv davrida millatlararo totuvlik oddiy ijtimoiy zarurat emas, balki strategik ehtiyojdir.

Bag‘rikenglikning tagida mehr, muloqot va hurmat yotadi. Bu qadriyat qalblarda mustahkam bo‘lsa, jamiyatda adovatga joy qolmaydi. Shuning uchun millatlararo totuvlikni asrash — tinchlikni, ertangi kunni asrash demakdir.

O‘zbekiston kabi ko‘p millatli davlatlarda bag‘rikenglik yuksak qadriyatga aylangan. Madaniyatlar uchrashuvi, an’analar uyg‘unligi, bir-birini hurmat qilish madaniyati — bularning barchasi xalqimizning asrlar davomida sayqallangan ma’naviy merosidir.

O‘zbekiston so‘nggi yillarda millatlararo totuvlikni mustahkamlash yo‘lida izchil islohotlar olib bormoqda. Avvalo, mamlakatimiz Konstitutsiyasida turli millat vakillarining teng huquqliligi, diniy erkinlik va etnik o‘ziga xoslikni asrash kafolatlangan. Shu asosda siyosiy, ijtimoiy va madaniy hayotda bag‘rikenglikni qo‘llab–quvvatlash davlat siyosatining ustuvor yo‘nalishiga aylandi.

Muayyan islohotlar qatorida Millatlararo munosabatlar va xorijiy mamlakatlar bilan do‘stlik aloqalari qo‘mitasining tashkil etilishi muhim o‘rin tutadi. Bu qo‘mita respublikadagi barcha milliy madaniy markazlar faoliyatini muvofiqlashtirib, ularning huquq va manfaatlarini himoya qiladi, millatlararo muloqotni chuqurlashtiradi.

Bugun O‘zbekistonda 140 dan ortiq milliy-madaniy markazlar faoliyat yuritib, o‘z tillari, an’analari va madaniyatini erkin rivojlantirish uchun keng imkoniyatlarga ega. Shuningdek, turli millatlar o‘rtasida hamjihatlikni mustahkamlovchi “Xalqlar do‘stligi uylari” ochildi va ular madaniy-ma’rifiy tadbirlar markaziga aylandi.

Bu islohotlarning barchasi O‘zbekistonda millatlararo totuvlikni mustahkamlash, turli etnik guruhlarning erkin rivojlanishi va jamiyat barqarorligini ta’minlashga xizmat qilmoqda.

Shunday qilib, bag‘rikenglik insoniyatni birlashtiruvchi eng ulug‘ qadriyatdir. Millatlar, dinlar va madaniyatlar xilma-xilligi jamiyatning boyligidir, bu boylikni asrash esa har bir fuqaroning burchidir. O‘zbekiston tajribasi shuni ko‘rsatadiki, o‘zaro hurmat va totuvlik mavjud bo‘lgan jamiyatda tinchlik mustahkamlanadi, taraqqiyot tezlashadi va xalqning qalbi kengayadi.

Demak, bag‘rikenglik bu nafaqat ijtimoiy ehtiyoj, balki ertangi farovon kunning ishonchli poydevoridir.

Habibullayev Oyatulloh
Mir Arab oliy madrasasi talabasi